هیبة اول……..
شما ذکرتک
بحّرت عینی علی الصورة القدیمة
الضامها بوسطة دواوین الأشعار
و شفت بیها سوالف أهلي
و رفة شوارب إبوی
المات…والدمعة الذبحها بجفنه
من رادت تهل و تراوي ضیمه
و کتبتلک حتی اوفّي الأسمک الصبّح هویتي
إغنیة ممزوجة بقضیتي
علی الغیمة
حتی تاخذها الریاح تدور بیها
و حتی من تنظرها ریمه
تغنیها (یا… هضیـــــــمه یا… هضیمه)
یا دلیل أوّل ثبات العَلَم گومي
السجلته رصاصة الچتّال بصدور النشامة
النامت بگلب التراب
و شیّعـت إسمه بأسمها
و خلّت بگصته علامة
وین ما اتصنــّط اسمعلک سوالف
بالمضایف… بالصرایف… بالشفایف…
علی الخدود المای… بالدهله… بنخلنه
وصورة بجناح الحمامه
العشعشت ببیوتک الکلهن تحّدي
حتی تسلم عالسلامة
وصرخت یمها الومن…! لولا متفید الملامه…؟
و حنـّن الجدران لیه
و علي ردّن صوت حزني
من حلگ شبّاچ بیتک
بیت ابوذیه
طلع بغبار ضیمه
وانفرش بستایر إذني و ظل یردد…
عود نجیمها بتچبیش و نشد
عود غلوف الم للحرب و نشد
عود اتبع سوانی الضعن و نشد
عود الحگ واگول البوش لیّه
—-
و نزّل ادموعی اعله خدّي
و شربت دمعة الجریة
وصاح بیه الصوت لهلي
وینکم یهل الحمّیة
وگمت اتخیّلک فارس سیفه بیدة
و حلم روحه الخضرة و إغنیتة و نشیدة
یمشی بحوافر مهرته إعله الأرض یکتب قصیدة
شطر نخوة و شطرغیرة وشطر همّة
و شطر هیبة و شطر ذمة
و شطر واحد یطري حلمة
و شطر یلوي چفوف عسمة
و شطر یزرع علی چتاف الزّلم نجمة
صورتک عندی إمرایة
بیها عطر زلوف البنیة التمشط چانت امها زلوفها
و تغني بسمک:
(تظل گمره بهالولایة)
و صورتک عندي روایة
بیها یحدي نهر کارون و یمد من یجري یمّک
و وگفتک تنعکس فوگ خدود مایة
و صورتک عندی إمارة
بهیبة أمجاد الفتیّة بزود عزمک
و موقفک خالد شعارة
وصورتک بأشعاری غایه
و شمس حمرة بلون دمّک
تچّت بمغرب بلادي
و ترکت اعله الافق رسمک
منها یاما إنچست صفحات الدفاتر من صفاتک
منبر الشیــّدته ظل عالی مچانة
لأن مسنود بمواقف تظحیاتک
و عادیاتک…. عادیاتک
آخ…. من اذکر مواقف عادیاتک
من ردسهن چانت شوارب خلیجیة تلوذ بفي عباتک
و بزري خاچیتک البدریه اتغّزل قافیاتک
و صوتک بداخل عرینک هیبه لهلک
وظلّن الهسّه یدوّن بالجبل خزعلیاتک
خذِت من تراب بیتک حفنة بیدی
و سولفت و یاها سالوفة زماني
و ذکرت دم الجره بهوسات عیدي
واصبحت مثلی تعاني
و گمت اشوبشها و افضها بالمدینة بیت بیت
و گمت ارجّع بیها لعجود المحلة
هیبة اول ….هیبة اوّل
و ذکّرتها بظهرک الشال الحمل و بیوم ما مل
وگامت تأذّن منایرها العتیجة
والسلف بیها فتحلک مشتهاتة
و بسمک الحالي فتح بالفجر ریجة
وطفح مي کارون و توضّت بمایة
وصلّت العزها و شرفها والف غایة
ولونها المغـبر عکس بیه الفجر لونه و تبّدل
وغاد ثغر حدیثه هلهل
وغاد واحد للزند من سمع شچّل
وغاد واحد درع زیجه
و بالوسط عالموت حوّل
و عبر صوت صیاحهم شباچ شباچ و تعدّه
و صارت الصیحات وحده
و هوّست الهم من حدر بخنگها سعده
و نشرو چفافیهم و رفرفن یمها
ومسحو دموع الغدة بالعین رمده
التفــّو علیها مثل لف الرواچیب إعله نشوه
و تچّو بذرعانهم شمسک الغابت
و خلّو عیون الغروب تبات رمده
و خلّو عیون الغروب تبات رمده
——————————–
المصدر:صفحة الشاعر و الاعلامي أبو موعود على الفيس بوك
كارون الثقافي، موقع أحوازي حُر ومستقل- حامد الكناني 
تشرفنا بزيارتكم ونتمنى دائما أن ننول رضاكم.