“طين وذهب”
جاسم الصاكي
چن ديرهِ مظفورا كَصب
احديثات باعَن عله هوا كارِت حطبـــ
كَيعان متروسه ذهب
صوت الفلحــ
تعلاكَه تركَص عل چتف
لزند بلماي الشلبـــ
وزلوف نخلات اسلف ويه العصر
ايشخبطن وجه الشمســــ
دخان تنور الخبز
حرملنهَ مطال العصر
عن الحَسد
كلشي فقر
خَرنوب متروس العكَل
ريحة مسچــــ
عصابه مشطوفه ابسعِد
دكَات عل وجنه خضر
واهلال نايم عل حنچــــ
اچفوف ابوي امن التعب خشنه سمَر
صفنات ابوي اويه العصر قوطي تتنــــ
ريحة عشكَـــــ
مامن چذبــــــ
اطفال نركض عل هوا ننّثر ضحكـــ
صوتـــ ٠الغنه
او درّمَت بنات وصكَله لعبات اليهل
لعبتنه طين اعلهَ الجرفـــ
وقصور نبني ابركَركَطه
تنسمع دكَات الحجل
تمشي اعله روحي من تمر
سرب الكَطه
ينصاد بجروف الجفنـــ
ايِفَل وطـــيح
تاخذني صفنه اعله الجرفـــ
يم الشَفلح و صريم
بلأم وغنيه وشبچـــ
ايصيد بجروف الكَمر
مشحوف هز چتف النهر
ايغازلّل البردي الكَصبـــ
انه و زَمـنــــ
لعبت عَضمــــ
مامن عطفــــ
ضيّع حلـمــــ
يذبحلي امالي الزغر
كلشي اختلفــــ
كَصت كَصايبهه النخل
دار الوكـــــــ
هاذ الزمنـــــ
يشتل ابصفناتي كَبر
جاسمــ ٠ الصـاكيـــ
مصدر القصيدة صفحة الناشط مشداخ الاحوازي على الفيسبوك
كارون الثقافي، موقع أحوازي حُر ومستقل- حامد الكناني 
تشرفنا بزيارتكم ونتمنى دائما أن ننول رضاكم.