من الشعر الشعبي الاحوازي قصيدة للشاعر الوطني محمد عامر زويدات مطلعها:”شجانه والتهينه وهذا يشتم ذاك”

شجانه والتهينه وهذا يشتم ذاك
گمنه نلوذ من عدهن
رمح عنه تصد ورمح بالدلال يتلگاک
شي متحزمه حزامين
وشي بس تشگف الطگات
واليتوسط ويحيزنه هم راسه شبع فلگات
وين تروح …ترجع للوطن بس مشنقه اتانيك
تبقى هنا تنتف بيك ربعك اكثر من اعداك
يا ميلت بختنه شگد عسم ممشاك
عفنه الغاصب المحتل يجول هناك
بالتنكيل والتفريس والتهجير واعدامات
وسجون نملت من كل صنف قامات
وناس امبسطه اعله الگاع
عود تعيش بالگوات
وبيهم ناس من العوز للمدرسه وده اثنين
وخله اثنين ما وصل بعد يشريلهم بدلات
واعدهم يسجلهم العام الجاي
گصر ما تلوح ایده
ولا يگدر یمد ایده
واگف یاکل بروحه
بوجهک یضحك ودم تنزف جروحه
هاي احوال اهلنه تعيش مقهوره
والتكتل قهر ساس المجوسي صاروا ذكوره
شعبنه سنين سطر بالنضال اسطوره واسطوره والايد التمدله العون من العچس مبتوره
والعين التشوف شلون محتلين
لا عميه ولا عوره
تعال انته يخوي ابصرها
شوف شلونها الصورة
عندك عدو عندك اهل مظلومين
ويمك ناس تصرخ وينها الطيبين
احنه شعب محتلين
منسيين
محرومين
منهوبين
مسروقين
مضطهدين
نطلب محنه مطلوبين
نطلب ثار عيسى وثار محي الدين
وثارات الخذوهم مشي لحد طهران مچتوفین
نطلبهم دموم من المحمره لحد البسيتين
ونطلب ثار حتى البعدهم عدلين
عفيه رجال والله وبعد بيكم زود
تدرون الوطن حيله بذممكم يا ربع مشدود
وعفيه شعب صابر صبر ماله حدود
حر وغبار وسياط الظلم تجلد زغار كبار
اهمه هناك وانته هنا
شافوا ظيم اهلنه بحلم ما شفناه
وصلتك يخوي حچایت اليهواك
لو تحتاج اوضحلك بعد لو اكثر اترجاك
ارد انخاك واترجاك
بسك بعد لا تشتم بهذا وذاك
اترجاك اترجاك
محمد عامر 1/12/2015

المصدر:صفحة الشاعر على الفيسبوك