خضيّر ابومنصور
یخضیر تحنـّـت گاعنا بدمک یبو منصور
دمک دم نبی لو دم امام الهسا بعده یفور
یخضیر یبومنصور
مر الگیض یخضیر و الف ضربة هوا مـرت
إجتنا تیبـّس دمومک ، تالی إبدمک إحمرت
و اجا فصل إصفری و کل الشجر یخضیر إصفرت
بس شجرة المن دمک تروّت زهت و اخضرّت
و غسالة یواخین الفلح بصریفتی ضرّت
إسکتت ما گول یخضیـّر علیّ صریفتی خرّت
اخاف صریفتی من احچی تغدی سالوفه بین الدور
دمک دم نبی لو دم امام الهسا بعده یفور
یخضیر یبو منصور
و شال الصفری چوالاته و اجا خلافه الشتا محزّم
إبحافات المطر و غیوم یخضّیر یگطرن سم
و بعدهی الگاع یخضیّر منها تفوح ریحة دم
و بعده صوابک یهوّس ما غمض ولا سلهم
بعده یدور صوابک یخضیّر علی المرهم
بعده یصیح ما أسمع دوی وعطاب ما أشتم
عرس لو موت یخضیّر وریحة مسچ لو کافور
دمک دم نبی لو دم امام الهسّا بعده یفور
یخضیر یبو منصور
یخضیّر و حافات المطر ما غسلن دمومک
یخضّیرعلی الدیره و شجرها انطبعن إرسومک
نجم سهیل یخضيّر کلـف ما ینحمل یومک
یرق و مرصّع إبفضه و ذهب ما نگدر انسومک
بعدک عدل یخضّیر ابد ما ماتن إعزومک
یخضیر چنت حاصود کلفه وللسّلف ناطور
دمک دم نبی لو دم إمام الهسا بعده یفور
یخضّیر یبو منصور
یخضیر چنت عین الگلاده و مرتعش لمّاع
لمّن تسمع النخوه چنت اوّل نفــر فـــزّاع
و انت الچنت یخضیّر إبمسحاتک تهبر الگاع
وحگ غیرة الهزتک یخضیّر وراک سباع
مانسکت عن اخذ الثار دمک مایروح ضیاع
یا سالوفة الدیوان یا بیــرق شرف منشور
دمّک دم نبـی لو دم إمام الهسا بعده یفــور
یخضیّر یبو منصور
یخضیّـر علی الرشاش اسمک صار حبـّـایه
علی إزنادها حچایاتک یناغن الــرمّــایه
یخضیّـر چفوف الثــّار تومیلک محنـّایة
یبو منصور ما نسکت و دمّک طرّز الرّایه
و نهرنا الصافی یخضیّر بدمک منخبط مایه
حتی النخل یخضیّر بعد مایکسر فیــایه
یا منجل ذبح شیّال موزر و انحدر للهور
دمک دم نبی لو دم امام الهسه بعده یفـور
یخضیّر یبو منصور
یخضیّر و حگ عیناک ما تبچی علیک العین
ما ینبچی علی الیمشی بدرب الشرف درب حسین
شهید انت بذلت روحک یبو منصور لجل الدین
و کل گطره الجرت من دمک الطاهر تظل سنین
فشگه بگلب عدوانک و صرخه إتوعی الغافین
یبو منصور ماننساک صدگ و الحمیّـه إتثور
دمّک دم نبی لو دم إمام الهسه بعده یفور
یخضیر یبو منصور
————–
المصدر:مدونة فلاحيتي
مركز دراسات عربستان الأحواز- حامد الكناني 
تشرفنا بزيارتكم ونتمنى دائما أن ننول رضاكم.