مسرحية
بيت و ثلث بيبان
الکاتب : علی ثانی
شتاء عام 2010
الأدوار
بشار: ألولد الثانی للعائله
سهام: البنت الوحیده للعائله
قاسم: الولد البکر للعائله
باسل: مهرب سلاح وتاجر مخدرات
الأم : أم قاسم
الأب : أب العائله
میلاد : ولد الجیران
بیت فیه غرفتین و مطبخ علی الخشبه وسط الخشبه حنفیة ماء . علی الیمین دورة مياه . علی الیسار باب صغیر مطل علی الزقاق . الباب الکبیر فی القاعه هو الباب الرئیسی للبیت / فی وسط الخشبه یوجد مکان ((دچه)) یجلس علیها الاشخاص وعلی الحائط مرآة موضوعه فی الوسط علی الحائط و بجنب المطبخ –علی الجدار ((سفرة خوص )) معلقه. هناک وسط البیت –علی الارضیه التحتیه – ملابس مغسولة علی الحبل .
(یدخل بشار و بیده حمامه و هو خائف يبحث عن مکان لیختبئ فیه)
الأم: بشار! بشار! هاولک …! شنوهای ؟ همّه اردود حمامه ؟ ولک شنو هالسوالف وآنه أگولن صار زلمه و یرید مره! ولک صخّم الله ویهک هاذ لعب مال یهال، شنو گاعد اتسوی ؟!
بشار : ألعب …! آنه او ربعی گاعدین نلعب غمیضه و… او … او… کلمن ایکظونه (بخوف) ینحبس !
الأم: ینحبس! بس عوزنه حبس و مصایب . ولک خلی الله ساتر علینه . غمیضه! لعد های اللی بیدک شنو ایگولولها؟ها؟
بشار : های؟! های… ها! های … های … خو حمامه ! أمّن … أمّن بیها فرد دگمه! بیها دگمه… لو تطگینها إتصیر طیّاره … لو تطگینها إتصیر سیّاره … او لو تطگینها إتصیر إفلوس –نوط أخضر-!
الأم: او لو إتطگها إردود تنگلب جناوی و حبس و طلایب و حکومه ؟! بسّک بس ! یا یمه ، مو های إسوالفک خلّنک إتعوف إلدرس و تتطشر بل إعجود!
بشار : أتطشر ؟ یعنی شلون ؟! ها….! (یقع علی الأرض) یمه… لمّینی …. لمینی ! لا تخلّینی أتطشر عفیه !
(یصحو علی صوت الضجیج قاسم فیخرج)
قاسم : شنو های الصیحه! الله بالخیر یمه!
الأم: صبحک الله بالخیر یمه . شوفا، شوف أخوک إللی لا یاخذ الحچی و لاشی ، شوفا!
قاسم :(یضحک) بشار؟! إشماله بشار؟ های شنو؟! إمنین لک های الحمامه ؟ آنه مو گایل لک إتعوف لعب الحمام و ترجع إلدرسک . ولک هاذه الحچی یمته ایرید إیدش إبراسک ؟ خویه ؛ عزیزی بشار …. شوف إنته باچر إیصیر عندک عائله . یعنی إتصیر مسئول . کون إتعوف های إلمسائل و اللعب ها. هالنوب گللی ؛ یا هو من وری إلحمام صار تاجر ؟ ها؟
بشار : های مو حمامه عادیه ! های بیها دگمه !
قاسم : هم برمو علیک ! یا دگمه یا چذب هاذ! إشلون بیها دگمه ها!
بشار : لو إتطگها إتصیر زولیه … لو إتطگها إردود تنگلب تلفزون!
قاسم : أو لو إتطگها تنگلب …؟
بشار : إفلوس…نو…ط…أخ..
(یدخل الأب)
الأب : یافلوس یا مصیبه … ألا أهوا إلواحد منکم کاض إلبیت و نایم . بالله إمنین إیین إلإفلوس إمنین…!/ شنو ، های الاهدوم مالات موته ؟
الأم: الله ایساعدک … إنطینی عنّک ، إنطینی (تاخذ منه المسواگ) سهام ، یمه تعالی لمی الإهدوم من ّ الحبل یمه!
(یقوم قاسم و سهام ويجمعان الملابس من علی الحبل )
الأب : الساعه بیش هسه ، ها؟ أشو یو چنّه مثلکم ما چنه هلگد إنّام !
((شباب))! شباب یش !شباب هاذه الوکت -باغه – بلاستیک –مو مالین شغل!
الأم: یا حجی إنته بس صلی عله النبی ! هالنوب ؛ إنته أحسن تدری ؛ ((ما كوأشغال )) !
الأب : ما کو اشغال ؟! روحی شوفی السوگ ! الناس إتروش . إللی یبیع سمچ و اللی ایبیع خضرا و اللی ایبیع … یا عمی ((إلزرع من فرفوره و الولد من خافوره))! شوفی شوفی ! الله علیچ هاذ عوزه کبر ، لو عوزه عگل (یشیر الی قاسم)
قاسم : (یقع علی ید أبیه) الله بلخیر بویه…
الأب : (یسحب یده بعنف ) و منین إیینه الخیر ؟ إذا واحدکم صلاته مایصلیها إلا وکت الغده!
الأم: حجی ، إنته زین تدری قاسم ما یتناسه عن صلاته ویصلیها اوّل باوّل !
الأب : إیهه…(بسخریه) خلها إتفیده ! شاب إبهیچی سن لاشغل لا عمل ، موعیب علیه! لو إنته ، إنته ! (یشیر إلی بشار) ؛ إللی إمگدک عنده مره و کومة یهال ! شنو هاذ اللبس إللی لابسه
بشار : (بسخریه) إشماله !
الأب : لویلبسنی ماألبسه ، شنو إنته هیتی ؟!
بشار : بی دگمه ، بیسواد…!
قاسم : ولک….
الأب : شنو ، هالنوب صایرلک مسخره جنابک ، تعال ، بالله تعال!
بشار : بی دگمه بعد! إتطگها ، إیصیر بنطرون … إتطگها إیصیر بجامه ، إتطگها إیصیر
الأب : (یصفعه علی رقبته) إیصیر إصخام ویهک ! و لک عود آنه هم خلّفت؟!کبرتکم و تعبیت ، حطیت إلکم بیت حتا لاتگولون ماچان عنده گعوه و لا منزل ! کبر أکبر من هل کبر (صارخا) لعد یمته تشتغلون و یرتاح بیکم گلبی!
الأم: حجی ، إن شالله یشتغلون !
قاسم : بویه الله کریم!
الأب : لعد یاهو گال الله بخیل !
بشار : (یشیر الی لباسه)بی دگمه…!
الأب : إنته إسکت ، إنچب ! (یصفعه وبشده علی و جهه فیقع)
(تصرخ سهام )
قاسم : بویه ، لا… ! إنته مالک حگ هیچ إتسوی بیهه ! أهوا صحیح إبنک ، بس بعده طفل !
الأب : (یمسکه من تحت حنکه) ونته جنابک…! لابد بعدک ((أقّووووه- بل إگماط ))! (یدفعه حتی یقع هو أیضاً ) شوفو ؛ منّا ورایح ، إللی إیریذ أکل ، إیجابل إلگصاب، برّه! (یصرخ فی وجه قاسم) برّه!
(قاسم یجمع ثیابه فی جنطه و یهم الی الخارج مودعا أمه ، تمسکه ممانعة إیّاه و تقف فی و جهه سهام )
سهام : بویه …! لا..! هاذه إبنک!
الأب : ونتی …؛ منّا و رایح ، طلعه إمن البیت ماکو! روحه للمدرسه ماکو، شنو عمی ؛ إتدرسین إلی ؟ أو من صرتی دکتوره ، یلاااا !
قاسم : یمه ، یمه الله أویاچ دیری بالچ عله خوانی . آنه رایح . فی مان الله …!
الأم: (تصرخ ) لا… قاسم لا… و تخرج ورائه!
علی الجدار صوره الأب مع شریط اسود علیها
القسم الثانی
صوت رنین موبایل یدخل بشار یکلم أحداً ویضحک و هو لابس ملابس شوارعیه .
بشار : آچا… آچا…، شما کیساهه ؟ مننون … شما؟ … چشمون… چشمون…آچا…آچا… سلامتی ، هیچ! … خواب ها …. فقط خواب …! مننون فیمان الله
(یغلق الخط) سهام ، سهام… شوفی ، شوفی ، مو بایل ! إذا بایل إشلون …؟!(یضحک) . بی مَزیقا… یعنی غنه و دندنه … او بی عکاسه … یعنی ایکظ اصور… او بی … بی فرد دگمه …. ماإدری وینها … بی فرد دگمه ؛ ایگللچ لو اتطگینها… ینگلب مسجل او لو تطگینها ینگلب تلبزون ، او لو تطگینها ینگلب … طیّاره … و یودیچ وین ماتردین.
سهام :(تضحک بأسی) خافن مثل کردیتک !
بشار : إیییییییی ! هم بی دگمه !
سهام أنته ألهسه عایش هشکل . ماتغیرت . های اسنین . تذکر یوم الگللک قاسم …
بشار : الله ایرحمه!
سهام :(بعصبیه) لا … قاسم مامات ، قاسم بعده عدل و فرد یوم کون یرجع إلنه !
بشار : تعای تعای ، شوفی … شوفی …های های … های اهیه الدگمه ؛ شوفی شوفی(یخرج منی جهاز التلیفون رنین و غناء ) شوفی شوفی صار مسجل شوفی، هسه إیصیر عکاسه ! (یصدر صوت خرج ریاح م من اسفل أحدهم) لا لا لا! اهو بی دگمه … بس ماأدری شلون! –إشلون ماأدری !
سهام : امی مریضه … واید … کلما بیها ألمها ایزود . بشار اشلون. کون کون انودیها للدطبیب!
بشار : ها! ای بس آنه آنه، آ«ه بعدنی أگلچ صبری ، صبری شوی . عندی فرد معامله ، بسأخلصها… شوفی شوفی های ، های اهیه الدگمه ؛ شوفی …
سهام : انته گاعد تسمعنی لو لا ؟ تسمع شنو اگللگ أمنه گاعده تموت إتریدنه إنصبّح یتامه ؛ لا أم او لا أبو!
بشار :لا ماودّی ، بس ، بس … آنه آنه عندی صدیق . ذیچ المره سوینه آنه اویا معامله کلش حلوه . بس خلصتها إشتریت هاذ الموبایل! او های المره ، بس ، بس إنخلص معاملتنا ، ایین عله إیدی افلوس وایده . إفلوس افلوس من صدگ، إتسمعین لو لا؟!
سهام : ما ادری ، خاف هاذه صاحبک هم یشتغل بل ….!
بشار : لا …لا…! هاذه … هاذه … اصلاً مو ایرانی ولا من هذوله ال…آچا…کیساهه! هاذه عربی . انسان محترم. اصلاً آنه آنه واید آحبّه . عجبنی واید عجبنی. شجاع و عله گص إرگبته مایخاف- أخو خیته او عزمته اییلنه إهنا! (تطرق الباب و بشده)
سهام : اییلنه إهنا؟!
بشار : ای ، لیش … إتخافین ؟! إتخافین او راس إخوچ إیشم الهوا(یتزحلق و یسقط من الخوف..) ؛ یاک ، یاک….یا هو…؟
صوت: إزبید …! إزبید!
بشار : یاهو ازبید؟ …یاهو ازبید ها؟!
صوت: إزبید إیگول الموبایل بی دگمه إذا اتطگها ایصیر طیاره …!
بشار : ها…(یتذکر شیئاً) إزبيد؟… (يفتح الباب ) اهلا ً و سهلاً شلونك يابه ، شلون احوالك الاخوه بل إعراق شلونهم ، أهلك إخوانك ، أمك إشلونها؟
باسل: امي … ! شنو ، چنت تلعب اوياها امصيگيلهه ولك !
بشار: لالا .. يعني ازبيد ، شلونكم؟!
باسل: واااا ازبيد إبخير … بس عوزنه خام و طعام ….! (يقهقه)
بشار: اهلا وسهلا تفضل تفضل استريح سهام ، سهام… ! چاي چاي !
باسل: شنو خدامه عدكم؟
بشار: لا لا … بس … ماعلين شايف الموبايل …؟
باسل: أش بي؟ شايف او شايف ابو بعد
بشار: ابو؟! أگلك أبو هم چان بي دگمه!
باسل: لا…! ابو ماچان هيچ. اصلاً اسمه همينه مچان هيچ!
بشار: شنو اسمه ؟ چان بايل؟
باسل: لا ، لا ، هاتف انتم إهنا اتگولوله ((تلفن))
سهام : سلام عليكم … (تقرب اليه الشاي)
باسل: هاي… هاي خدامه عدكم لو …
بشار: سهام (صارخاً إياها) سهام يا اااا داخل!
باسل: هاي اشبيك ، شنو صرت مثل المطي تنعرو تنهر! لو شكل مايگولون ( مثل سير وسركه عزيزم)!
بشار: ما علينه اشلون الاعراق ؟
باسل: يعني شلونه إبرأيك ؟ أشو هيه كلها سلب و نهب و مفخخال و تفجيرات و قتل ، اشلونها يعني؟ (( إيحلها امن السدر و يعكرها ابتوثيه))
بشار: بس ازبيد ابخير ها!
باسل: بس عوزه خام و طعام (يقهقه) اگول … اشوف الوضع زين هلأيام ، ها! نقال و كاشخ او خابص روحك ، لك ذبعرضي عندي الك فد معامله ابعمرك مراح تخسر بيها . راح اترفعك من هل سيانه العالي علييين راح اترفعك الجنة عاد ، افتهمت ؟
بشار: جنة عاد ؟جنة عاد يا صوب صايره؟
باسل: جنة عاد منته سامع بيها ! آنه راح اگول لك وين صايره ، تدري وين صايره ، تدري…؟ تدري وين…؟ آنه هم ما ادري !
بشار: ازبيد … اشلونكم
باسل: مادام هل مطي ابخير كلنه ابخير
بشار: لعد اشمالك اتخربط ، مو متريگ ها ؟ إمشي ، إمشي واااا ارد اغديك فرد غده ابعمرك مو متعشي مثله!
باسل: چنه هواي إمأثر اوياك الموبايل مو هيچي ؟ امخربصك اتخربص – حتا ناسي الريوگ من العشه!
بشار: اي اي ! لگيتها ! لگيتها اوگف اوگف اهنا او لاتحوس ! (باسل تاخذه الرهبه ثم يصوره بشار بل موبايل فيصدر منه صوت خروج غازات من اسفل احدهم)
باسل: هاي شنو ؟ لك…
بشار: ما علينه امشي انروح نتغده امشي!
(يخرجون ثم تلبس سهام عبائتها و تتجه نحو الباب الخلفي فتلاقي ميلاد داخل منه)
سهام : ميلاد … شتريد؟!
ميلاد : سهام…! سهام وين رايحه؟
سهام : شتريد محد بل بيت !
ميلاد : ماريد شي گلتي محد بل بيت (يراوغ) … بشار … بشار وين راح ؟ هاذ هاذه اللي اويا ياهو سهام ، من عدكم؟!
سهام : لا مو من عدنا و لا يعود النه ، هالنوب انته شلك شغل، شتريد ميلاد ها…؟ ما گلتلگ محد اهنا ؟
ميلاد : لا ، … ماكو بس (يرتجف) آه … آخ .. يقع علي الارض
سهام : (صارخه) اشمالك گوم … إنته مريض ؟
ميلاد : لا لا ، بس (يتلوي) بشار گللي اهوات اهوا رايح ايجيب جنسات ….
سهام جنسات …؟ ميلاد …. إن …إن … إنته تشرب؟ (تغضب) اطلع منا … اطلع بره … (تصرخ) يلاااااا !
ميلاد : سهام … اخوچ قاسم … وصاني عليكم او گال دير بالك عله سهام او عله امي ، آه… او دير بالك عله بشار تره بشار بعده ياهل ! مايعرف شنو ما شنو…
سهام : وصاك و هيچ اذا مو اموصيك چان اشسويت ها ؟ (يمد يده الي قدمها بغيره فتبزغ عليه و هو يقهقه) تف عليك و عله غيرتك! اطلع بره ، بره…!
(يدخل باسل بعفويه )
باسل: هاي شنو … ! شوف شوف ! الگاع نگعت من جوه رجلينه و حنه يل غافلين الكم اااا ! سهام!
سهام : هاذ ابن جيرانه … جاي يسئل عله بشار … بشار… بشار وينه ؟!
باسل: لا … لتخافين سرچ ابير…! بشار ما راح يعرف بل قضيه
سهام : قضيه؟!!
ميلاد : انته ياهو
باسل: ياهو … ياهو دات كام! اجاك الموت يا فاتك الحيه و الناموس! (يخنقه)
سهام : لا … عوفه هاذ ابن جيرانه عوفه!
ميلاد : لو ما اكظك ! وين اتروح مني ولك وين ، بس اطلع منا و آنه اعلمك !
باسل: اي يابا! لك مو آنه يمك . اشوف اشلون تحفه راح اتسويها بيه ها؟!
سهام : عوفه ااااه ايخليك هاذه عنده شغل ويه بشار . حتا اسئل بشار اهو اهو … عله طول يشرب و يشتري من بشار مخدرات!
باسل: شلون ! (يتركه) اي هسه ! چان اتگول من الاول لك مو خربطت كشختي خرب حظك!
ميلاد : (يسعل) واااا لو ما الخاطيرچ چت اخليه زوليه او يمشون عليه الرايح و ال جاي!
باسل: (يمسكه مره ثانيه) لك مو گلنه من فد بيت و حترمناك لا تخلي أصنع من جلدك اكشوس مغّاطي !
سهام : (تصرخ) مات … عوفه اااا ايخليك عوفه لا!
ميلاد : تعوفني لو اترك المخدرات وهجم ابيوتكم و وكسد تجارتكم يا فسقه!
باسل: (يتركه تارة ) لك من نعله عله اسلافك اتريد تهجم بيتي و بيوت العالم (يخنقه تارهً اخری) من اااا يهجم بيوتكم مثل ما هجمتو ابيوتنه. موت!
سهام : لا …! عوفه شنو وخذ شنو ماتريد عفيه!
باسل: (يفكر هنيئه) شنو ما رايد؟ كل شي ؟!
سهام : اييه! بس لا تموته . نبتلي . تره وااا نبتلي
باسل: ماشي ! بس وعد ها !
ميلاد : (وهو يختنق) كون احچاية زلم ها!
سهام : وعد !
باسل: (يتركه ) إمشي … رحمت حالك الليدي … و إلا هسه إنته من عداد الفطّس!
ميلاد : إلفطّس؟!!
باسل: ديا اااا مشينه ! إلفاطسين إلفطسص جناب الفيلسوف ! بس شوف(يمسكه من عنقه) مره ما اگولها ثاني مره ؛ هذا البيت محرم عليك دخلته افتهمت !
ميلاد : (في هيبة جندي) صار سيدي !
باسل: (في هيبة عقيد) استرح!
سهام : يا اااا روح امشي …. بعد لا تخلي ريلك اهنا روح …
ميلاد : سهام(متباكيا)
سهام : روح صلح نفسك ! روح!
ميلاد : (وهو خارجا) تعال يم بيتنه وآنه اعلمك اشلون!
باسل: لك(يطارده و هو هارباً)
سهام : يا ربي دخيلك !
باسل: سعادة الخاتون ! منو هاذه ، جيرانكم ها؟!
سهام : انته غريب او ماتعرف الوادم . لا تتدخل ابعشتنه!
باسل: اي ياباه! ولچ ( غاضباً منها) و اااا العظيم … اذا ما خليت اچلاب المزبله ايضحكن عله حالچ اكون آنه مو باسل ! خلي … خلي يجي أخوچ التحفه و يشوفها إلإخته شنو گاعده تلعب بلبيت ؛ بغيابه گاعده تلعب لعب….
(تصفعه مسقطةً إياه الي وجه الارض)
سهام : منته من ظهر ابوك لو ماتگلله . إذا تصير مو إنته …. ابوك و جدك و سلف سلفاك مايگدر يلطخ سمعتي ! آنه اهنا الديره كلها اتعرفني سهام بت ادريول القچقچي – زلمه ! هاذه الحچي خله اتخوف بي اللي ماعدهن شرف ولا قابليه حاضرات ايبيعن نفسهن الخاطير الفلس. ولك اسمع زين ! هاي آخر مره اتفك حلگ و تفوح منه هيچي إخياس . وذا عدتهه ألطمك عله وجهك واللي ايريد ايصير خللي ايصير…
(يهرع اليها باسل محاولاً أن يصفعها و لاكن تشل يدة ممتنعاً)
باسل: مره! إب آخر عمري اضربلي مره . فوتي … فوتي آنه أعرف تدبيرچ (يصرخ) يا اااا!
(يدخل بشار مهرولا)
بشار: شنو … سهام؟! شنو صاير ؟!
باسل: سهام صاير شي او ماتگللي لي ؟احچي اكو أحد إمحاچيچ( ينظر يحقد الي باسل) اكو واحد گايللچ شي !
سهام : ماكو بس…
بشار: (يصرخ) بس شنو ! ما أحطه و سويهه إفراش ، سهام…!
باسل: (( طوووووووزززز!))
(يتصاعد أنين الأم فتهرع إليها سهام )
بشار: إنته … إنته …. (مشاكساً إياه) وين غبت وين ولليت ها؟!
باسل: آنه … آنه ضعت منك بل لوخا! گلت گبل لا اضيعن وسط الناس خليني ارجع للبيت اهنا بلكي ترجع و الگاك
بشار: زين … خوش … وين سويت ! هاذ ابو گهوه ايتانينه
باسل: إثنين نفر كباب؟
بشار: نفرين و بو گهوه هم اوياهم نشويه شتگول؟!
باسل: او نشوي ابوه هم بعد يا اااا !
(يخرجان)
سهام : بشار … بشار… هاذ راح و خلانه لا هيچ و لا هيچ . (تبكي) اااا ايرحمك يبويه چان ايگول ؛بشار بعد الف سنه يا اااا ايصير احمار! ( تبتسم) قاسم …آه يا بعد بيتي يقاسم … وينك خويه. چان ايگول بشار عمره ما راح يتغير ابد . بشار ظال ابعالم طفوليته ايصول و يجول و يمرح هاذه محل لعبه و وناسته . هاذه وكت مدرسته . امن يا وسفه و الف يا حيف ؛ صدقان الشوارع … مايخلون للواحد عگل ابراسه خاصه واحد مثل بشار هيچ أدمچ . آه آه…! لو قاسم چان موجود … لو چان موجود ماچان صار اللي صار. ابوي هم اااا ايرحمه . ما چان يدرك . لا يدرك الام و لا يدرك الولد الشاب و لا يدرك البت . مايعرف الا نفسه . احچايته اهيه اللي چانت ماشيه . امي عجزت من كثر ما گالت له ؛ جوز من الولد … جوز منه … ابوقاسم ، ما كو شغل … وين ايروح خله! … هليوم ماشتغل باچر ايحصل شغل عوفه … عوفه رحم اااا والديك … لا لا … ! يرجع عليها و يطگها! آنه آنه همه من چنت اتداخل ايطگني و يگلي ؛ بعد ماكو روحه للمدرسه افتهمتي! بشار … بشار بااااا تعال اهنا …. شنو هاي بيدك … شنو … ياي … يايب لي حمامه … ولك صخم اااا ويهك … صخم …. آنه يوم چنت اب حلك ماظلت گاع تعتب علي ! ماظلت احدود ، ماظلت فيه ماني طارها! و لك عود… عود صاير لي زلمه ولك … (( بيها دگمه واااا بيهه دگمه !)) ولك دگمة اصخام ابوجهك من طيح اااا حظك و تدبيرك روح . اييييه ! الحمد ااا هاي إهيه قسمتنه !
(يدخل باسل و بشار منتشيان)
باسل : وينه … وينه الحمام؟
بشار : الحمام ؟! شنو ، إتريد تسبح إبهل صبح ؟!
باسل : عمه اعيونك – صبح- ولك ظلمت . ليل هسه ليل ! ياااا الحمام الحمام ! بابا الدسشويي!
بشار : ها…! خو گول من الاول ؛ المرحال !
باسل : (مستأصلا) زين المرحال ، دورة المياه … اصخام ابوجهي فكني بس گول!
بشار : دورة ميّات …؟ها؟
باسل : دخيل ابوك احچي ! گول!
بشار : ما ادري بس اذكر ابوي چان ايگل لل لوله حنفيه و ايگل لل مستراب (( أدب))
باسل : (مستأصلا بلا حدود) مستراب!!
بشار : او من چان ايطگني و يزمخ علي چان ايگللي ؛ (( عندك أدب لا ثقافه!)) وآنه … وآنه اگول عدنه واحد بل بيت . اي عدنه ….
باسل : وين لك خرب بيتك!
بشار : (متفكراً) وين وين يا بشار… ها! إهناك (يشير إلي اليمين فيركض ويختفي باسل وراء ستار باب الخلی)
باسل : أوفففففففييييييييييههههههههه!
بشار : شنو هاي هليكو باكتري چان!
باسل : لا قنبله ذريّه!
بشار : ماتريد أبريج!
باسل : عوفني … عوفني هسه … عود بعدين ؛ بعد إخلاء القذاءف
بشار : إيهه قذائف ابوك .(يشغل الموبايل و ينسي قضية باسل في الخلاء) (صوت رمي و قذائف هاون و طلقات ناريه كثيفه)
باسل : دخيل … دخيل ابوكم بوش … دخيل ابونه بوش … دخيل الأمه العربيه … آني رجل غير مسلح …
بشار : ياهو انته ….
باسل : باسل طرطور خرنوب القندرچي سيدي!
بشار : ها…؟ ها! إنتم چم و احد چم واحد اتدشون للمرحال ها؟(يصرخ بسخريه ) إطلع…!
باسل : سيدي…سيدي … لا… لا مو آني …. مو آني …
بشار : عريان….؟
باسل : عريان سيد خلف؟! لا ….آني ماني جاهز
بشار : حته لو باچه چت همه انطبخت هسه ، اطلع!
باسل : لك … بشار … هاي إنته مهطور!
بشار : لا هاي أمي … آنه لعد ياهو بعد غيري ؟ماتريد أبريج
باسل : راح گلبي … ماظل عندي گلب
بشار : بس مصران و چلاوي ها!
باسل : لك ! احترم نفسك ! جيبه ، جيبه للأبريق!
بشار : : ابريق لو أباريق ؟ مو مايفيدك ابريق مو؟!
باسل : وين صرت ؟ إحممم احححم !
بشار : ياهو … عرّف نفسك !
باسل : (بخوف) باسل مجيد غواو التكريتي سيدي!
بشار : هاي انتم اشلون دشيتو ثلاثتكم سوي !
بشار : چاوينه ذاك الگال الخوه للضيج /خلاني بل مرحال ماجاب الابريج!
بشار : هاك او اذا مايزّاك دبر حالك –مشكلتك!
باسل : (يخرج) آنه ماشايف مرحال ايشيل هلگد ، هذه ايشيل له عائله !
بشار : اذا شال ثلاثه … لابد ايشيل اكثر بعد!
باسل : اگول ، اشلون امورك هل ايام ؟
بشار : واااا الحمد ااااا وشغل …نشتكر…
باسل : اقصد شنو چنك ناسي ، موني موني؟!
بشار : آچا …آچا…
باسل : (يمسكه من عنقه) هاي سويها اويه غيري آچا…. – افلوس !
بشار( يقول اشياءً لاتفهم) …
باسل : (يخف عليه الخناق) شنو گلت؟
بشار : لا ماكو شي بس چنت اشوي اكحن!
باسل : شنو (يخنقه ثانيه)
بشار : (مرة ً ثانيه يكح) هبه با هبا عبه با عبه مو هبه با عبه هبه!
باسل : شنو ؟ شنو داتگول ؟
بشار : لا بيه سعله … لالا … آنه ابخدمتك … بس خلي اصرف الحمله التاليه
باسل : يا تالي يا بطيخ… تعال و تعال ! أو دگ علي تليفون ، لك! اذا بهل يومين ماسوينك افلوس !
بشار : او اذا گلتلك ماعندي؟!
باسل : اسويك افلوس و اتصرف بيك افتهمت !
بشار : لا ، لا، ابوي … اااه ايرحمك گلي مره ؛ إنته بعد الف سنه إنته بعد الف سنه اتظل ما تفتهم !
باسل : اگعد خلي نتفاهم !
بشار : اي عوفني تيهني !
باسل : شنو انته مربوط !
سهام : ( تخرج من الغرفه) بشار!
بشار : (بعصبيه) دشي داخل … يا اااا ،هذه شغل زلم ، افتهمتي!
باسل : ( يتركه ليجلس) اگعد خلي نتفاهم!
بشار : نتفاهم ! اي يا اااا گول
باسل : آني شنو گلت لك ؟ مو گلنه افلوس الحمله مالت الاسلاح اتجيبها الاول بل اول ؟ او عود تالي نتفاهم علي المخدرات مالتك –اشلون وشگد – حته انوزعها الك بل….؟!
بشار : (بهيئة المحترفين ) عِراق!
باسل : عفيه عليك ، زين ، جيب الإفلوس!
بشار : ماعندي
باسل : مو اگلك جيبها ، شن تريد اتغشني ولك آني باسل ، ما حمار!
بشار : لا لا لا ! حشه حشه ، حشه الاحمار عنك
باسل : شوف دا اگولك اليوم جبتهن ، دبرت حالك ، ماجبتهن ، اسوي من فچوچك انعولت نسوان چِك چاكي ،افتهمت ؟!
بشار : لا لا ، كل شي ولا انعال چك چاكي ، (يمسك بفكه) او هال نوب نعال نسوان!
باسل : (بشرانيه) لو…
بشار : اي ! .. لو شنو ؛ ها ؛ گول آنه اموافق !
باسل : لو … (ينظر الي سهام و هيه واقفه عند راس اخيها بشار)
بشار : شنو ، مايفيدك ، تره النعال الچك چاكي ابد مايفيدك ! شنو احضيري ابو عزيز ؛ لَ لَ لا له …. … حسن برّه !
باسل : لو تنطيني ، خدامتكم هاي!
…..
المصدر:مدونة المسرح العربي في عربستان(خوزستان)
مركز دراسات عربستان الأحواز- حامد الكناني 
تشرفنا بزيارتكم ونتمنى دائما أن ننول رضاكم.