بالجامعه اشگد دوريت
مالگيت اعيون متکحله
ماکو سمره احچيلهه ابيوت مهداوي
وگعد اوياهه دقيقه ونبتسم
ماکو وحده اتگول « چا »
ردت وحده تتلفظ « لعد »
اهواي احب اسئل فتاة
عن مفردات
چانن ابديرة أهلهه ايعطرن اجواء المظيف
وهسه ماتن
دورت کل الصفوف
ردت بت امن الفلاحيّه اگلهه
اشلونهم اهل الفلاحيّه – يرنـّون –
وصلکم ماي
لو بعده الماي مسدود
بعدهوا الهور؟؟
بعدهوا البني ايغازل الشبوط ؟؟
لو يسچب المشحوف عبره
ويحن الگذلة البردي
وثغره ايحب رضاب الهور
احب ديوانکم
احبن بيت ابوذيته
واحبن بيت مواله
ملافاضل ملافاضل کيف حاله ؟؟؟
ردت وحده ابحية الکراسه اگلهه امنين انتِ ؟؟
دمچ اهوايه يشابه اهل المحمره
البيرق الرفعوا عمامچ
بيرق الوحده
بشريني بعدهوا بالسلف منشور ؟؟
انتو اعزاز عندي اهواي اريدنکم
هم الغيظ هدّم بيت بسمتکم ؟؟
عين النخوه خبريني بعدهي اتشوف ؟؟
لو حِيّه إتوچد
وتذکر ابعبره زمان الحور
ذمه برگبتچ
وصلي سلامي الحسن عاشور
ماکو وحده من اهل عبادان اگلهه
اهلچ شيّدوا تاريخ إلنه
سترة يدچ الماصار عنده اوليد
وين راحت ؟؟
اکيد مکويّه وبعدهي امعطّره ابعطره
واکيد ابجيب هالستره ظلت ورگه بيها ابيات ابوذيّه
يبت عمي اشلونهه – الفيّه –
احب شط العرب لو غاض
احب احضن شواطيه
ردت وحده اوياها اسولف
عن سوالف قيس لبنی
وقيس ليلی
وعن سوالف فيصل ونوري سعيد
مالگيت … مالگيت
*****
للشاعر توفيق نصاري من مدينة الفلاحيّه
ذي الحجه 1432
مركز دراسات عربستان الأحواز- حامد الكناني 
قصیده جمیله جداً